Dossier: Creemos debate na aula (25.01.16)

Saúdos, navegantes!

Velaquí vai a primeira entrada do Dossier sobre a materia “Didáctica da ensinanza das linguas estranxeiras”. Tal e como aparece explicado no Diario do día 25 de xaneiro, este tipo de publicacións incluirán resumos, notas, comentarios e reflexións acerca das actividades de aula realizadas nas sesións. Hoxe, falaremos das actividades realizadas o día 25 de xaneiro.
    


En total, realizamos dúas actividades de aula, que poderemos empregar como futuras docentes e que teñen como obxectivo principal favorecer a comunicación entre os membros do grupo, ben a través de debate, coa “pirámide”, ou ben mediante un xogo de preguntas e respostas, con preguntas tipo “Wh- questions”.

En primeiro lugar, realizamos “a pirámide”, unha actividade para ordenar certos elementos dunha lista segundo a súa importancia chegando a un consenso entre todo o grupo-aula. No noso caso, traballamos cunha lista de seis contidos da propia materia. Comezamos debatendo en parellas para, despois, ir poñéndonos de acordo coas parellas do lado, ata formar dous grandes grupos na aula. O último paso consistiu nun gran debate entre os dous grupos a través de voceiros, que debían argumentar os motivos das eleccións.

Chegamos a unha conclusión rapidamente, xa que a maioría coincidía en que a cuestión máis importante que debe coñecer un docente é como planificar e programar a súa materia. Por que? Porque a planificación é a base da que hai que partir e inclúe tódolos demais aspectos da ensinanza. Ademais, grazas a ela pódense acadar resultados dun xeito organizado, adaptándose ás necesidades de cada grupo e contexto social, xa que permite reflexionar sobre o devir das sesións e das actividades.

A segunda actividade que realizamos foi unha pequeno xogo de preguntas e respostas, divididos en equipos de 4 persoas. Cada grupo debía redactar 5 preguntas sobre os contidos tratados na sesión seguindo o modelo das “Wh- questions”, é dicir, preguntando “que”, “cando”, “como”, “onde” e “por que”. Despois, por quendas, os equipos debían interactuar, polo que formulaban ditas cuestións e intentaban dar a resposta correcta.

   

Esta actividade pareceume moi útil de cara a unha clase de idiomas ou calquera tipo de materia, xa que, ademais de traballar as destrezas comunicativas do alumnado dun xeito ameno e dinámico, ofrece a oportunidade de recapitular e incluso reflexionar sobre os contidos vistos ao longo da sesión.

Falar nas clases de idiomas

Conseguir que o alumnado fale na lingua meta nunha clase de idiomas pode ser un reto para os docentes. O medo a falar en público, a timidez, as dúbidas gramaticais ou a falta de vocabulario son algúns dos motivos polos que moitos e moitas se negan a abrir a boca diante dos compañeiros e compañeiras. Por iso decidín investigar un pouquiño máis acerca deste tipo de metodoloxías para crear debate na aula. Pois ben, como resultado da miña busca, atopei un documento que me resultou interesante, “¿Cómo hacer hablar a los/las alumnos/as en una clase de idiomas”, de Heike D. O. Nesta publicación coméntase a importancia de traballar as destrezas comunicativas nas materias de idiomas, xa que, por exemplo, aprender a falar na lingua meta é fundamental para avanzar na aprendizaxe. Porén, o que máis me chamou a atención do artigo foi a lista de actividades que se propoñen para poñer en práctica a comunicación oral e os consellos que se ofrecen para que estas actividades funcionen. Este pequeno listado está organizado por categorías: actividades con transferencia de información, de resolución de problemas, baseadas na diferenza de opinións, discusións e debates, xogos de rol e simulacións.

Como conclusión, gustaríame engadir que a miña opinión xeral sobre este tipo de actividades é que poden resultar moi útiles nunha clase de idiomas, para activar vocabulario e perder o medo a falar diante dos compañeiros e compañeiras dunha forma divertida e nun ambiente agradable (e ata podería dicir distendido). Gustaríame que ao longo das sesións desta materia de didáctica fixeramos máis actividades e puxeramos en práctica outras metodoloxías deste tipo, xa que considero que nos serán de axuda no noso futuro como docentes.

Que opinades vós, navegantes? Resultouvos útil esta entrada? Tedes algún segredo para facer que o alumnado participe na aula? Coñecedes máis actividades para crear debate na aula? Non teñades medo a falar e compartide na sección de comentarios a vosa opinión.